شاع بين المسلمين بعض العبارات الخاطئة والتي تصل في بعض الأحيان إلى الكفر والشرك بالله. وهذه العبارات يستخدمها البعض دون التفكير بما تعنيه. ويبرر البعض استعماله لهذه الكلمات بأنه يقولها بنية حسنه وانه لا يقصد المعنى الحرفي متناسيا قول الله سبحانه وتعالى (( ما يلفظ من قول إلا لديه رقيب عتيد)) .
و فيما يلي قائمة بما شاع من العبارات مع توضيح سبب النهي عنها :
ربنا يقدرني اني اجمعلكم جزء كبير منها
*لا حول لله يا رب: نفي يقتضي كفر قائله والعياذ بالله من ذلك، فهي تعنى أن الله سبحانه وتعالى لا حول له. والأصل أن تقال كاملة (لا حول ولا قوة إلا بالله.
*فلان شكله غلط: فيه سخرية واعتراض على خلق الله تعالى، وفيها استهزاء بالمخاطب.
*بالرفاء والبنين: تهنئة أهل الجاهلية والأصل أن يقال (( بارك الله لك وبارك عليك وجمع بينكما في خير. ))
*ظلمني الله يظلمه,
*الله يظلم اللي ظلمني: اتهام لله بالظلم والله سبحانه حرم الظلم على نفسه وجعله بين عباده محرما، يقول الله تعالى: (( من عمل صالحاً فلنفسه ومن أساء فعليها وما ربك بظلام للعبيد ))
*ربنا افتكره: نسبة النسيان إلى الله تعالى.
(( وما كان ربك نسيا ))
*الله يلعن المرض : المرض من قدر الله وفيه تسخط من قدر الله تعالى
*لا سمح الله: الصحيح أن يقال : لا قدر الله .
*هو الله داري عنك فين: نفي لعلم الله سبحانه وتعالى.
(( وَهُوَ اللَّهُ فِي السَّمَاوَاتِ وَفِي الْأَرْضِ يَعْلَمُ سِرَّكُمْ وَجَهْرَكُمْ وَيَعْلَمُ مَا تَكْسِبُونَ))
*يا نهار أسود,
ده كان يوم أسود,
ده زمن أغبر :قال رسول الله صلى الله عليه وسلم (( قال الله عز وجل: يؤذيني ابن آدم، يسب الدهر، وأنا الدهر، بيدي الأمر، أُقلب الليل والنهار))
*الله بيعطي الفول للي ما لوش سنان,
الله بيعطي الرزقة للي ما بيستاهلها,
يعطي الحلق للي مالوش ودان :كأن الله سبحانه وتعالى يرزق الناس دون علم بهم.
(( يعلم ما بين أيديهم وما خلفهم ولا يحيطون بشيء من علمه إلا بما شاء ))
*البقية في حياتك: (( ولكل أمة أجل فإذا جاء أجلهم لا يستأخرون ساعة ولا يستقدمون
وده ليينك للشيخ مسعد انور بيتكلم فيه عن الموضوع ده
http://www.islamway.com/?iw_s=Lesson&i...lesson_id=21604http://download.media.islamway.com/lessons...Anwar/AMthAL.rmوالشيخ بيقول مقدمة حلوة عن اللسان وخطورته
والحاجات اللى بيذكرها الشيخ فى درسه :
1 - الحلف بغير الله
2 - سب الدين
3 - الإستهزاء بالله أو برسوله أو بكتبه .. أو التحريف والإستخاف بالقرآن ..ومن يخترع النكت عن الملائكة أو عذاب القبر ونعميه .. أو من يستهزئ بملتزم ويسخر من لحيته وهيئته التى هى على سنة الرسول عليه الصلاة اولسلام .. أو يسخر من نقاب إمرأتك فيقول خيمة .. وكل هؤلاء يستهزئون بالدين !!
4 - وصف الشرع بالوحشية والهمجية والتخلف .. كطلب بعض النساء بمساواة الرجل للمرأة فى الميراث والمطالبة بإلغاء شهور العدة أو المطالبة بإلغاء التعدد وهكذا
5 - القول ( ده حتى لو انطبقت السماء ع الأرض ) فلن افعل كذا مثلاً
6 - القول ( ده حتى لو ربنا نزل لى من السماء ) فلن أفعل كذا مثلاً .... حاشا لله
7 - توجيه ( اللوم ) لله عند نزول المصائب ( ليه كدة يارب ؟ اشمعنى أنا يارب ؟ )
8 - سب القدر ( قدر أحمق الخطى - عبث الأقدار - غدر القدر - لعبة القدر ) أقدر الله أحمق ؟ .. حاشا لله
9 - القول ( زرع شيطانى ) .. أو ( زرع ألاوى ) !
10 - المثل المصرى ( يدى الحلق للى بلا ودان ) !
11 - المثل ( رزق الهبل على المجانين )
12 - المثل ( هى بتيجى مع الهبل دوبل )
13 - القول ( الناس اللى لا بترحم ولا بتخلى رحمة ربنا تنزل )
14 - القول ( اسم النبى حارسك وصاينك )
15 - عمل عروسة ورق وثقبها بإبرة والقول ( رقيتك واسترقيتك من عين اللى شافك وما صلاش على النبى ) - عليه الصلاة والسلام - اعتقاداً ان هذا يمنع الحسد ويجلب المنفعة - كذلك الخرزة الزرقاء والحظاظة وما شابه
16 - القول ( انت " مصلب " ديماغك ليه )
17 - القول ( البقية فى حياتك - حياتك الباقية ) عند العزاء فى الجنازة
18 - القول ( ربنا إفتكره ) على من مات
19 - القول ( إفتكاره رحمة ) لمن كان مريضاً
20 - إطلاق لفظ ( مرحوم - شهيد ) على كل ميت حتى وإن مات فى الميادين دفاعاً عن الإسلام !
21 - القول ( توفى ) بفتح التاء .. فالذى يتوفى هو الله والصواب ( تُوفى ) بضم التاء
22 - المثل ( اللى يعتقد فى حجر ينفعه ) .. فهو مثل يدعو إلى الوثانية
23 - المثل ( إذا نزلت فى أرض تعبد العجل حش واديله ) .. خليك منافق .. إمعة !
24 - القول ( احنا بنقرأ فى سورة عبس ) تقال للأغبياء الذين لا يفهمون !
25 - القول ( خير اللهم اجعله خير وودانى بتصفر وعينى بترف ) أى التشاؤم وهو شرك بالله
26 - القول بأن الكروان يغرد ويقول ( الملك لك لك ياصاحب الملك ) !!
27 - القول ( الجمعة فيها ساعة نحس )
28 - اعتقاد النساء أن الحالق أو من يحمل بلح أحمر أو من يحمل لحمة إذا دخل على المرأة بعد الوضع سيُحرم إبنها من لبن الرضاعة وتُحرم المرأة من الإنجاب ثانية
29 - القول ( أنا هعتمد على الله وعليك - تركت الأمر ده لله وليك )
30 - القول ( أخد الشر وراح ) عند سقوط كوب أو كسره
31 - القول ( دستور يا أسيادنا ) عند الزيارة وقبل الدخول
32 - استخدام البخور بغرض تبخير المحل لجلب منفعة ومنع ضرر .. ولكن يجوز استخدامه بغرض الرائحة الطيبة .. فالنية هى الفيصل ... كذلك دفن عرسة صاحية تحت عتبة باب المحل !!
33 - القول ( أنا واثق من نفسى ) عندما تقول له ذاكر وصلى وادعى ربنا عشان تنجح
34 - القول ( كتر السلام يقل المعرفة )
35 - عدم نطق اسم الله بنطقه الصحيح .. وهذا من الإلحاد بأسماء الله
36 - نشر الرسائل اللى تحتوى على أشياء كاذبة والقول بأن نشرها سيجلب المنافع وإهمالها يجلب الخسارة .. فمجرد طبعها هو شرك بالله
37 - القول ( ماشى على كف الرحمن - ماشى على كف عفريت ) !!
38 - إطلاق لفظ ( ذنوبة ) أو ( خدوجة ) على النعل !!
39 - القول ( لاحول لله )
40 - القول ( مثواه الأخير ) عند الدفن
41 - القول ( ده احنا زارنا النبى ) للضيف عند الزيارة
42 - القول ( ثورة الطبيعة - إبداع الطبيعة )
43 - القول ( لاحياء فى الدين ) .. ولكن قل لا حياء فى العلم
44 - قول النساء ( أنا مش مقتنعة ) عند عرض الحجاب عليها !
45 - فهم بعض آيات القرآن على الأهواء مثل الإستشهاد بالآية ( الفتنة أشد من القتل ) ليخوف ابنه عندما يكذب أو الإستشهاد بـ ( لا إكراه فى الدين ) عندما يعاقب الأب ابنته عند عدم لبسها للحجاب
46 - المثل ( اللى يعوزه البيت يحرم ع الجامع )
47 - المثل ( لو شوفت أعمى قول عساه هو أنت أحن من اللى عماه ؟ )
48 - القول ( ربنا عرفوه بالعقل )
49 - القول ( ربنا موجود فى كل مكان )
50 - المثل ( الأقارب عقارب )
51 - اعتقاد أن من مات قتيلاً خرج له عفريت والقول بأن المكان مسكون !
52 - القول على الطفل ( شقى )
53 - المثل ( كل شيخ وله طريقة )
54 - القول ( لبسته العمة ) كسخرية
55 - القول ( أنا عبد المأمور ) عند التبرير لفعل شئ حرام أو غلط
56 - المثل ( اربط الحمار زى ما يعوز صاحبه )
57 - القول ( ده زمانه بيأكل رز مع الملايكة ) على النائم
58 - المثل ( إن كان لك عند الكلب حاجة قول له يا سيدى )
59 - القول ( كسبنا صلاة النبى ) - عليه الصلاة والسلام - يقولها تعبيراً عن الخسارة !
60 - القول ( الله ورسوله أعلم )
61 - القول ( ربنا وقف معايا ) عند النجاح مثلاً
62 - القول ( االعصمة لله والكمال للنبى محمد ) - عليه الصلاة والسلام - والعكس هو الصواب
63 - القول ( العمل عبادة ) تبريراً لترك الصلاة
64 - القول ( ساعة لقلبك وساعة لربك )
65 - القول ( ده أنا أعتبر من العشرة المبشرين بالجنة ) تفسيراً لانه أحسن ممن حوله فى الدين !
66 - القول ( ربك رب قلوب ) تبريراً لتقصيره
67 - القول ( إحنا عملنا اللى علينا والباقى على ربنا )
68 - القول ( اللهم إنى لا أسألك رد القضاء ولكن أسألك اللطف فيه )
69 - القول عند المشاجرات ( كل اللى له نبى يصلى عليه )
70 - القول ( ده أنا ماليش غيرك .. ده ربنا فوق وانت تحت )
71 - القول ( يا شمس يا شموسة خدى سنة الجاموسة وهاتى سنة العروسة ) عند خلع السن
72 - إطلاق لقب ( شيخ ) على أى حد عبيط أو متخلف عقلياً
74 - القول ( عليا الحرام من دينى لتفعل كذا )
75 - القول ( كتر خير الدنيا )
76 - كتابة لا إله إلا الله فى ورقة وفى الجزء الآخر محمد رسول الله وكل واحد يأخذ جزء عند السفر
فلازم تسمعوا الدرس إن شاء الله عشان تفهموا أكتر وتسمعوا الآيات اللى فيها نهى عن الألفاظ دى
وكمان تستمتعوا بأسلوب الشيخ مسعد اللى أكثر من رائع
والله أسلوبه ممتع جداً
بالإضافة للطرائف الكتيرة بتاعته
الشيخ مسعد أنور بيقول حد قالهم ان إبليس شغال عندنا فى وزارة الزراعة !
والمثل بتاع ( اللى يعوزه البيت يحرم ع الجامع ) ..
الشيخ مسعد أنور بيقول ( رواه بخيل )
والشيخ محمد حسان بيقول ( رواه مفجوع ابن مفجوعة )
جزاهم الله عنا خيراً
وحاجة أخيرة ..
اللى بيقول حاجة من الكلمات دى ما يقلقش وما يقولش لسانى اتعود عليها وييأس
مرة فى مرة هتعرف تبطلها إن شاء الله .
المهم تفكر نفسك
الإثنين مارس 08, 2010 10:32 pm
